Stærstu hluthafar

Hluthafar Regins hf. voru 760 í lok árs 2016 samanborið við 581 á sama tíma 2015. Fjöldi einstaklinga sem hluthafa hefur aukist til muna.

Lífeyrissjóður verslunarmanna er með 12,88% hlutdeild í heildarhlutafé félagsins, Stefnir hf. er annar stærsti hluthafinn með 11,88% og Gildi - lífeyrissjóður þriðji stærsti með 7,38% hlutdeild. Hlutdeild stærstu hluthafa hefur farið lækkandi með stækkandi eignasafni, dreifðari eignaraðild og nýjum stórum hluthöfum.

Þróun hlutabréfaverðs

 Á hluthafafundi 22. mars 2016 var stjórn veitt heimild til að auka hlutafé félagsins um 126.600.000 krónur að nafnverði. Hlutafjáraukningin tók gildi í kerfum Nasdaq Iceland hf. þann 29. mars 2016. Hlutafjáraukningu var ráðstafað til kaupa Regins á öllum hlutum í fasteignafélögunum Ósvör ehf. og CFV 1 ehf. Lögbundinn forgangsréttur hluthafa gilti ekki um hið nýja hlutafé. Hlutafé í Regin fyrir hlutafjáraukninguna var 1.428.700.000 krónur að nafnverði og er að henni lokinni 1.555.300.000 krónur að nafnverði. Hver hlutur í Regin er ein króna að nafnverði.

Þróun hlutabréfaverðs í Regin var jákvæð á árinu 2016. Fjöldi viðskipta með bréf í félaginu var 1.400 og heildarvelta á árinu var 23,9 milljarðar króna sem er aukning frá fyrra ári þegar veltan nam 14,9 milljörðum króna.

Árslokaverð á bréfum Regins í kauphöllinni var 26,2 en var 19,6 árið 2015. Gengi bréfa félagsins hækkuðu því um 33,7% á árinu og var langt umfram úrvalsvísitöluna (OMXI8) sem lækkaði um 9,0% árið 2016. Markaðsvirði félagsins í árslok nam 40,7 milljörðum króna en var 28 milljarðar króna í árslok 2015.

Skipting hluthafa eftir hlutafjáreign

Lífeyrissjóðir voru stærsti hluthafahópur Regins í árslok 2016 með 43% eignarhlut og lækkar lítillega frá fyrra ári. Bankar og einkahlutafélög bæta lítillega við sig. Mestu breytingar milli ára liggja í minni eignahlut fjárfestingasjóða sem fara nú með um 24% hlut en fyrir ári 28%. Áhuga erlendra fjárfesta á félaginu hefur aukist og halda erlendir aðilar nú á um 3% eignahlut í Regin.